Gistiaðstaða
4x2ja manna, 4x3ja manna og 2x4ra manna stúdíóíbúðir og 1x4ra manna séríbúð. Í 2ja manna og 3ja manna íbúðunum eru einbreið rúm en í 4ra manna íbúðunum eru 2 einbreið rúm og 1 tvöfaldur svefnsófi. Í hverri íbúð er eldhúskrókur, sérbaðherbergi og setu/borðstofurými. Verönd hjá hverri íbúð með garðhúsgögnum. Sérinngangur í 6 íbúðir (allar íbúðir með sérútgangi á verönd). Íbúðirnar eru í þremur byggingum á bænum sem áður voru vélaskemma og fjós en hefur verið breytt frá grunni og innréttaðar á vandaðan hátt í eilítið grófum en hlýlegum og björtum sveitastíl með nútímalegu yfirbragði. Í stærstu byggingunni, nýrra „fjósinu“, er móttaka og lítil setustofa. Úr öllum íbúðunum er útsýni til sjávar yfir Holtsós og að auki til fjalls úr sumum íbúðum.
Vel uppaldir hundar eru velkomnir. Á bænum er ógeltur hundur og því ekki heppilegt að koma með lóða tíkur.
Þjónusta
Í hverri stúdíóíbúð er vel búinn eldhúskrókur með öllum nauðsynlegum áhöldum til matargerðar og borðhalds (og að auki kaffi, te, mjólk, matarolía, sojasósa, pipar, salt og sykur). Næstu matvöruverslanir eru á Hvolsvelli (35 km) og í Vík (40 km). Í grenndinni eru nokkrir ágætir veitingastaðir, t.d. á Hótel Önnu (2 km) og á Hótel Skógafossi (12 km). Matsölu- og veitingastaðir eru einnig á Hvolsvelli og í Vík í Mýrdal.
Afþreying
Góðar gönguleiðir í grennd við gististaðinn og víðar á þessum slóðum. Hestaferðir frá Skálakoti (3 km). Vélsleðaferðir, jöklagöngur og ísklifur á Sólheimajökli. Bátsferðir á hjólabát við Dyrhólaey. Áhugavert byggða- og fjarskiptasögusafn á Skógum. Næsta þéttbýli: Hvolsvöllur (35 km); þar eru m.a. góð útisundlaug, ýmis ferðaþjónustufyriræki, Sögusetrið (Njals's Saga Centre), Eldfjalla- og jarðskjálftasýningin Lava Centre, verslanir og vínbúð.
Slakið á og njótið náttúrunnar
Í Varmahlíð var stundaður hefðbundinn búskapur allt fram til síðustu aldamóta. Gestgjafar eru nú með 25 kindur á húsi og hund og kött. Gestum er heimilt að ganga um alla jarðeignina þar sem er mikil náttúrufegurð og foss til prýði í klettunum ofan við bæinn. Salat og kál er ræktað á bænum og á sumrin liggur uppskeran gjarnan frammi til nota fyrir gesti eins og hver vill. Í Holtsósi er silungur og ef heppnin er með veiðimanni og gestum er nýr silungur í boði.
Seljalandsfoss, Þórsmörk, Vestmannaeyjar
Skúrinn – The Garage í Varmahlíð er tilvalinn gististaður þegar ætlunin er að kanna náttúrufegurð miðsvæðis við suðurströnd landsins, hvort sem er í byggð eða í fjalllendinu undir Eyjafjalla- og Mýrdalsjökli. Í vesturátt er stutt að aka að Seljalandsfossi, á Hvolsvöll og inn Fljótshlíð eða niður í Landeyjahöfn (15 km) þar sem má taka ferjuna á sumrin til Vestmannaeyja. Í Þórsmörk eru 45 km frá Varmahlíð en þeir, sem eru ekki á vel búnum jeppum og vanir að aka yfir ár, ættu að taka áætlunarferðir í Þórsmörk frá Hvolsvelli.
Skógafoss, vinsælasta byggðasafn, Reynisfjara
Sé haldið í austur frá Skúrnum er úr mörgu að velja. Að Skógafossi eru 12 km og tilvalið að ganga upp á fossbrúnina og dágóðan spöl upp með ánni á heiðinni þar sem 26 minni fossar gleðja augað. Gestir ættu heldur ekki að sleppa því að eiga dagstund í Byggðasafninu á Skógum. Í sömu ferð er svo sjálfsagt að heimsækja Dyrhólaey og Reynisfjöru eða ganga upp að Sólheimajökli.
Gestgjafar: Anna Birna og Sigurður Jakob