Þau Knútur og Helena í Friðheimum í Bláskógabyggð standa um þessar mundir í heilmiklum framkvæmdum. Til stendur að auka framleiðslu á Friðheima-tómötum og er byrjað að vinna að því að byggja rúmlega 2000 m2  gróðurhús til viðbótar við það sem er til staðar. Í allt mun tómataræktun vera í 5200 m2 gróðurhúsum.  Áætlað er að setja niður tómataplöntur í nóvember og uppskera eftir næstu áramót. Friðheimar eru þátttakendur í Opnum landbúnaði, þar sem  gestum gefst tækifæri á að heimsækja bóndabæi og kynna sér þau störf sem unnin eru í sveitum landsins.
 
Í Friðheimum er einnig boðið upp á stutta og hnitmiðaða hestasýningu þar sem farið er yfir sögu og gangtegundir íslenska hestsins á fræðandi og skemmtilegan hátt.  Þeir gestir sem hafa áhuga á grænmetisræktun gefst einnig kostur á að skoða tómataræktun á bænum í framhaldi af hestasýningunni.  Knútur og Helena hafa hug á að útbúa frekari aðstöðu til að taka á móti gestum í gróðurhúsinu og mun sú aðstaða verða tilbúin næsta vor.
 
Fyrir nokkru var farið í fjölskylduferð héðan af skrifstofunni til félaga okkar í Friðheimum og hér fyrir neðan má sjá nokkrar myndir frá þeim góða degi. Það er óhætt að segja að hestasýningin og heimsóknin í gróðurhúsið hafi hitt í mark hjá öllum í hópnum, bæði stórum og smáum.